كل عام و انتم بخير 2013

للعام السابع على التوالى تستمر المدونة فى عرض الافكار و نشر الموضوعات الهامة و اللى جاى احلى ..

الجمعة، 11 ديسمبر 2009

محدش فااااااااااااااااهم حاااجه

التليفزيون المصري اشترى المسلسل التركي مهند ونور بعد ما الدنيا كلها شافته وحفظته

بخمسة مليون جنيه

"مش كان الاحسن يدفعوا المبلغ ده في تطوير البرامج ولا تدريب المذيعين"

" بدل اعلام الريادة اللي كاسفنا في كل حتة ده"


...................................

في نفس اليوم اللي كانت ايران بتحتفل فيه باطلاق اول قمر صناعى تصنيع محلى،

رغم الحصار اللي بتتعرض ليه من الغرب ،

كان دكتور نظيف بيلقي خطابه في مجلس الشورى وسط الظلام بعد الكهرباء ما قطعت 4 مرات..

فعلا بلدنا بتتقدم بيهم


......................................

وزير التنمية الإدارية بيقول ان تقديم الخدمات الحكومية عن طريق الانترنت هايقلل من الفساد بين الموظفين،

" بس يا خوفي الموضوع يرسى في الآخر على تطوير الفساد نفسه "

" ونشوف طلب الرشوة بالايميل وسدادها بالفيزا كارد .. وعجبي"

........................................

الدكتور زويل بيقول ان العالم سيشهد ثورة تكنولوجية اسمها كوانتم إنتانجلمنت

هاتخلي الإنترنت حاجة قديمة ..


"يا سلام ، طب وايه يعني ، ما احنا كمان الحكومة بتاعتنا ابتكرت مشروع فصل الانتاج عن التوزيع"

" وقضت على 70% من مشكلة رغيف العيش."


................................

الجماعة اللي بيقولوا ان الزمالك مستواه سيء،

" بالعكس الفريق مستواه بيتحسن من مباراة للتانية ، "

"بدليل انه في المباريات الأخيرة كل ماتش بيجيب لجمهوره .. نقطة"


................................

وزارة الخارجية بتقول ان ايران – يا عيني - محبطة من النجاحات المصرية المستمرة ،

" طبعا عندها حق، حتى بأمارة الخمستاشر قمر صناعي اللي اطلقناهم السنة اللي فاتت،"

والتسع مفاعلات نووية اللي عملناهم غصب عن العالم كله، ده طبعا غير اهم انجاز حققناه "

"خلال العشرين سنه اللى فاتو و هو مشروع .. فصل الانتاج عن التوزيع"

...................................

أسئلة بريئة .. ليه التلوث محاوطنا في كل حتة رغم ان رئيس الحكومة اسمه نظيف،

وليه الغم راكبنا رغم ان رئيس مجلس الشعب اسمه سرور؟

‎وليه التعليم في الجامعات في الأرض رغم ان وزير التعليم العالي اسمه هلال؟


"لو عرفت الإجابة اتصل بالحزب الوطني لتفوز بجائزة قيمة .. سيخ ماركة حديد عز"

................................

على من يقود سيارته في شوارع القاهرة ان يتمتع بمكر الثعالب وسرعة الفهود وجرأة الاسود

ولا مبالاة الافيال ووقاحة الضباع .. وصبر ايوب


...................................

عاوزين تعرفوا قيمة المثقفين في بلدنا، اسمعوا دي .. رقاصة شهيرة - بتمثل دلوقتي -

قابلت الأديب العالمي الراحل نجيب محفوظ وهي سايقة عربيتها الفاخرة وهو راكب عربية متواضعة جدا،

فقالتله: بص الأدب عمل فيك ايه ! فرد عليها بسرعة بديهة: بصي قلة الأدب عملت فيكي ايه



..................................

التحرش الجنسى فى حفلات المطربين بقى موضة اليومين دول،

ومابقتش حفلة تعدي من غير حالات تحرش جماعي،

واخرها حفلات التحرش .. قصدي الحفلات الفنية بتاعة مروى وتامر وحكيم،


" وقريب هايبقى اكتر بند بيختلف عليه متعهد الحفلات والفنان .. المتحرشين عليك ولا عليا"

.........................................

الوزيرة المثيرة للجدل مشيرة خطاب عايزة تنسب الطفل لأمه وتقول ان هذا ليس وصمة عار للطفل،

"ونحن بدورنا نتساءل هل حدث لا قدر الله خلاف مع المطرب الشعبي احمد عدوية"

"الذي أطلق منذ عقود شعاره التاريخي إدى الواد لأبوه"

........................................

في 2008 قال الكابتن حسن شحاتة ان من اسرار فوز منتخب مصر بكأس الأمم سماع اللاعبين

أغنية مشربتش من نيلها لشيرين،


" انا عرفت دلوقتى ليه الحكومة مش عايزة تعمل حاجة في اللى حصل اكيد بيسمعوا وردة الجزائرية"

.......................................

ابوتريكة راح الزمالك ..الحكومة رخصت أسعار البنزين وزودت المرتبات بنسبة 20%..

وقررت صرف إعانة بطالة للشباب ؛

وبقي مفيش طوابير في اى حتة؛ والناس هتموت من الانبساط

" ...فوق....... دية عينة من رابع المستحلات اللي انسي انك تشوفها"
...................................

بعد ما طلعت علينا وزاره الكهرباء والسيد حسن يونس وقالك هنبيع ونخصخص الكهرباء،

" يا ترى المستثمرين الجدد هيوفروا كروت شحن الكهرباء بأسعار مهاودة ولا نقضيها بطاريات"
...............................

وزارة الداخلية مشكورة عاملة على موقعها على النت صفحة لتلقي شكاوى المواطنين والاجانب،

لكن الغريب ان الجزء بتاع الاجانب بس هو اللي شغال والجزء بتاع المواطنين عطلان،

" فهل هما فاكرين ان ماعندناش شكاوي، ولا المقصود اننا ننسى انهم يسمعونا؟"

......................................

التوعية بخطورة انفلونزا الخنازير لازم تتعمل للخنازير نفسها لان الواضح

ان الناس مش قادرة تستوعب الموضوع،


" علشان كده الاعلانات لازم تخاطب الخنازير انها تخلي بالها من الانفلونزا وما تلعبش"

" مع بعضيها ولما تحس انها مريضه تبلغ عن روحها ؛ علشان تبقا شاطرة كدا وامورة"

...................................

المفروض نحتفل كلنا باليوم القومي لتقديم الساعة في التوقيت الصيفي

"علشان باين كده ان هي دى الحاجة الوحيدة اللي بتتقدم في مصر"

"وتصدق بيرجعوا تانى يأخروها ...دا كيف التأخير ده"

......................................

اتعودنا كل ما يحصل حريق الحكومة تقول ان السبب ماس كهربائي،

وساعة ما العربية انفجرت قدام الكنيسة قالوا برضه ان السبب ماس كهربائي،

" واضح جدا ان حكومتنا حافظة مش فاهمة"

...................................

القضاء امر بحجب المواقع الاباحية في مصر،

"بس يا خوفي الحكومة تفهم الحكم دي بطريقتها وتقفل مواقع المعارضة والبلوجز،"

" وأي موقع يوجعلها دماغها تقولك قفلناه لأنه اباحي، انت هاتعرف اكتر من الحكومة."

والكلمة الشهيرة : نحن نسعى من اجل مصلحة المواطن ؛ وسلملى عالمصلحة"

.....................................

بعد قرار منع المواقع الإباحية في مصر ..

"كله دلوقتى بيسأل : والنبي محدش يعرف هى نمرة الاستاذ برايز كام؟"


.......................................

احد المسئولين حذر من تحويل 93 سجين مصري باسرائيل الى جواسيس ..

" يعني بدل ما نحاول نرجعهم نقول عليهم هايبقوا جواسيس، "

" ولا احنا مستخسرين نرجعهم توفيرا لنقفات نقلهم لمصر، "

"طيب ما للتوفير اكتر نخلي اسرائيل تعدمهم ونخلص"

.....................................

أخيرا ضمنت وظيفة في أوروبا بعد 41 سنة من دلوقتي بعد تصريحات الوزيرة

أن أوروبا حتحتاج للعمالة العربية سنة 2050


"أهو الواحد يكون لشة في عش شبابه برضو ويبدأ يكون نفشه ويتجوش وهو عنده شبعين شنة"
.......................................

"في ناس بتطالب بإسقاط الجنسية المصرية عن كل مصري اتجوز اسرائيلية"

" يا ريت اللي بيطالبوا ماينسوش كمان الناس اللي بقالهم سنين طويلة .. متجوزين إسرائيل نفسها"
.....................................

طالما الحكومة مش ناوية تعمل حاجة في المدخنة اللي الناس عايشين فيها باستمرار دي ..

" يا ريت الجماعة اللي بيحرقوا قش الرز يتفقوا على يوم واحد يولعوا فيه في القش كلهم مع بعض"

" وعلى المقيمين خارج القاهرة مراعاة فروق التوقيت"

....................................

من اشهر كلام الحكومة اللى حفظناه

" نحن نسعى لبناء مستقبل افضل " تعالى قابلنى

" نحن فى الاول يهمنا مصلحة المواطن المصرى " " مهو باين"

"اقتصادنا المصرى في تطور مستمر" "هم بيتكلموا عن ناس تانية ولا ايه"

ليست هناك تعليقات:

إرسال تعليق

ممكن تقدروا تشاركوا معانا و تقولوا لنا رأيكو فى موضوعاتنا