كل عام و انتم بخير 2013

للعام السابع على التوالى تستمر المدونة فى عرض الافكار و نشر الموضوعات الهامة و اللى جاى احلى ..

الخميس، 11 ديسمبر 2008

وضب سبسب اصبغ واحدف طوبه بوسط الملعب لازم تكسب/

قضايا عصرية

وضّب لبسك ..

سبسب شعرك ..

و اصبغ خصلَه بلون الفرقة

و احدف طوبه بوسط الملعب ..
لازم تكسب .


هلِّل .. طبِّل .. صوَّت .. عيَّط .. عدِّد .. ندِّد

كورة و جنب القايم عدِّت

و امَّا تروَّح ..


إفتح قنوات الأخبار

طفل صغيَّر
أصغر منك كده بكتير

شايل طوبة

بسِّ الفرق مـَ بينكوا كبير

هيَّ الطوبَه بإيده سلاح

هيَّ الأمل الباقي عشان

يشهد بعد العتمة صباح
هيَّ الأم

و بعد ما راحت منُّه
الأم ف آخر عيد

هيَّ الأب
و بعد ما شاف الأب ف صورة

مكتوب فوقها إنُّه شهيد

هيَّ الأخت اللي اغتصبوها
ف آخر غارة

هيَّ الأخ برغم السجن

و رغم القيد


صوتُه بيخلق جوَّه الضلمة
فجر جديد

قلِّب بين قنوات الدِّش

الفين رقصه و الفين غنوه

و الفين كلمة بتجرح فينا

كل معاني الدين و الدنيا


هلِّل ليهم

و امدح فيهم

روح حفلات الرقص و طبِّل

تحت مزاعمِ إنِّ الدنيا همومها
كتيرة و لازم ننسى



سبِّ الأرض و قول الأرض بتطرح شرْ
و انك عايش وسـط المــرْ

روِّش نفسك

إيه هيضر ؟

هلِّل
طبِّل
ندِّد
عدِّد



بعد ما هانت فينا النخوة

و شفنا صبايا ف وسط حجابهم

قالوا يا رب و فجَّرُوا روحهم
شفنا مناضل ..!



رغم العجز و رغم الكرسي
كان بيقاتل ..!!

سيبك سيبك
خليك ف همومك و نصيبك

حكم الملعب ظلم الفرقة
و ضاع الكاس




و الحلم انهار
عمرو دياب يا جماعة التُّوب
و تامر حسني و ملك الجيل
مين هيفوز بميوزيك العام ..!؟




يلاَّ اختار

ريفولي بتعرض فيلم دمار
كلُّه مناظر ع المكشوف

دي الحرية
طلّ و شوف



نانسي و هيفا صبايا جنان
قالوا فلانه ف حضن فلان

نحو و صرف دي حاجة تشل
بيس يا معلم و انت يا مان




هلِّل
هلِّل


تحيا قضايانا العصرية
و ارجع قول العيشة المرِّ
و مش بتمر




وَ انْت المرِّ بكل ما فيه

قبل ما تلعن طرح الأرض
ف قعدة قهوة



إسأل نفسك
امتى عزقت و امتى عرقت
و امتى تعبت

و امتى رفضت الظلم
و قلت الـْ لأْ

أعظم لأْ



و لاّ هقولك
هلِّل .. طبِّل .. صوَّت .. عيَّط .. عدِّد .. ندِّد
و احدف طوبة بوسط الملعب

و ابقى قابلني
لو يوم تكسب

ليست هناك تعليقات:

إرسال تعليق

ممكن تقدروا تشاركوا معانا و تقولوا لنا رأيكو فى موضوعاتنا