ازاى تعرف انك بتقرى جورنال مصرى

هنقول شويه حاجات اول ماتشوفها تعرف ان الجورنال اللى في ايدك جورنال مصرى

ونبدأ

1_ عندما تقرأ مانشيت لا يتغير قبل يوم شم النسيم بيوم واحد( ضبط 8 اطنان اسماك مملحه فاسده )

2_ عندما تقرأ في اليوم التالى ( وصول 1500 حاله تسمم الى مستشفي ناصر بعد وجبة فسيخ فاسده ) يعنى هيتاكل هيتاكل فاسد بايظ برده هيتاكل

3_ عندما تقرأ قبل بدايه شهر رمضان خبرا عن طرح 100 طن سكر 700 طن زيت 500 طن رز
( المصريون يأكلون اكثر في شهر التدريب على الجوع والخشوع )

4_ عندما تقرأ قبل عيد الفطر ( ضبط 20 مليون بومبه و 750 الف صاروخ في ورشه بحلوان )
هذا بالنسبه للأطفال .. اما بالنسبه للكبار ( ضبط تاجر مخدرات وبحوزته 170 لفافه بانجو ) بس المرادي في الطالبيه مش في حلوان عندنا

5_ عندما تجد دوما ان زاويه صدق او لا تصدق تعنى دائما ( لا تصدق )

6_ عندما تنشر صحيفه كبيره جداا .. اعلان لمحل كبير يقدم عروضا وتخفيضات
وتكتب اعلى العنوان وبخط كبير ( العرض مستمر ) وتنسي وضع نقطه
فوق احد الحروف ( والحدق يفهم بقي )

7_ عندما ترى حوارا كبيرا مع مسئول يتكلم فيها عن وعود سوف ينفذها او عن
كوارث حدثت ولكنه لا يتكلم ابدا عن انجازات حققها

8_ ولأن الصحافه الفنيه تحتل جزءا كبيرا من الصحف ..

كيف تعرف انك تقرأ تصريح لفنان مصرى؟ ..
عندما تقرأ هذه المنشتات..

_الفن سرق أمومتى ( التصريح الدائم للفنانات السوبر ستار اللاتى تجاوزن سن ال 50
يحاولن من خلاله ان يؤكدوا اسهاماتهم الجامده في مجال الفن واننا منقدرش نستغنى عنهم )

_ لا امثل بفلوس زوجى ( تصريح تقوله نجمات أصبحن يلعبن دور البطوله بعد ما كانوا_ بيتنشقوا على دور _ ودلوقتى بيقوموا بالبطوله في افلام من انتاج ازواجهم
وفيهم اللى مشواره الفنى وقف بعد الطلاق وفيهم اللى احترف الزواج بالمنتجين
علشان ياخدوا أدوار البطوله )

9_ أبحث عن بنت الحلال ( تصريح بيقوله النجم الشاب علشان يضحك على عقول معجباته _ ويداعب أحلام المراهقات بأن تكون واحده منهم هى بنت الحلال _ ويصاحب هذا التصريح بصوره النجم وهو مفرط في _ التسبيل _ )

10_ أبحث عن فارس احلامى ( تصريح تقوله النجمات الشابات تصحبه صوره زى الصوره اللى بتحتفظ بيها _ الخاطبه _ في حقيبه اديها )

11_ زوجتى صديقه معجباتى ( تصريح للممثل الشاب الذى يكون من الصعب التخيل ان ليه معجبات اصلا ) يعنى بيشتغل نفسه

12_ ارفض القبلات والمايوه ( تصريح لفنانه مصحوب بصوره تكون فيها بملابس اشد سخونه من المايوه _ واحيانا بيكون الفيلم التالى ليها محزوف منه مشاهد بالهبل )

13_ اقبل الاغراء اذا كان في السياق ( تصريح لممثلات لا يصلحن بالاساس لأدوار الاغراء )

14_ الانتشار في مصر له طعم تانى ( تصريح للممثلين والمطربين العرب والذى فقد بريقه من كثرة ترديده دون ان يشرح أحدهم طبيعه هذا الطعم ) يعنى اذا كان كباب أو شطه و لمون

15_ التلفزيون يحرق الممثل ( تصريح يقوله الفنان اللى اجره في الفيلم فوق المليون جنيه ذلك الاجر الذى يستحيل الحصول عليه من التلفزيون )

16_ التلفزيون اقصر طريق لقلوب المشاهدين ( تصريح الممثلين اللى بيبقوا نفسهم يمثلوا في السنيما و مش عارفين )

17_ سينيما الشباب مجرد فقاقيع وهوجه ( تصريح الفنانين الكبار اللى الزمن عدى عليهم )

18_ مفيش ورق ( تصريح اجابه على سؤال _ انت ليه بتعمل افلام تافهه؟؟؟ )

19_ افلام لا تخجل انك تروحها مع اسرتك ( تصريح ممثلى الافلام الساذجه )

20_ افكر في الاعتزال ( تصريح لقدامى الفنانين بعد أن أحس بأن الجميع يهجره وهو بهذا التصريح يحاول انه _ يصعب على المعجبين بتوعه )

21_ الحجاب ليس ضد الفن ( فتوى الفنانه اللى اتحجبت و اعتزلت ثم عادت للفن )

22_ اللى مش عاجبه يغير المحطه ( تصريح _ راقصات _و خلي بالك (مقولتش مغنيات) الفيديو كليب
وهو تصريح يتسم بالوقاحه .. ربما يعرفن اننا بالفعل بنغير المحطه )

23_ الموهبه أهم من الجمال ( تصريح ممثله يكون السبب او مؤهلها الوحيد هو وجه جميل او لقب ملكه جمال سابقه )

ملحوظه
الموضوع مش شامل كل الجرايد طبعا

همشي أنا بقي و ادعولي أنجح

سلام